في قديم الزمان و في يوم من الأيام, رحنا أنا و مجموعة من الشباب نعزي صديق النا بوفاة جده – رحمه الله – في قرية " كفر عوان – محافظة اربد " . طبعا بعد ما هلكنا و احنا بندور على القرية و كمان على المضافة و صلنا و ترجلنا من السيارة و دخلنا الى المضافة التي تشبه الكهف. المهم ابن عمي كان أول واحد فينا و على الباب خلع حذاءه بس الطريف انوا كمان شلح الجرابات ! و احنا كنا 4 شباب وراءه و لما شفنا انوا عمل هيك, كلنا عملنا نفس الاشي و شلحنا جراباتنا قبل أن ندخل اعتقادا أنوا هاي العادة عند الجماعة. و أكيد بعد الجلوس في المضافة بلشت عمليات الترحيب المستمرة "مرحبا على اليمين" و "مرحبا على الشمال" حتى انوا في وقت من الاوقات حسينا حالنا في ملعب كرة قدم و بنعمل زي ما بعمل المشجعون حركات الامواج التي بتلف حول الملعب. و لما روحنا و ركبنا السيارة كان أول سؤال سألتوا لابن عمي "شو هل العادة الغريبة انو الواحد لما يدخل على المضافة لازم يشلح جراباتوا؟" فنظر الي ابن عمي وقال" شو! أه صحيح انتو كلكوا ليش شلحتوا الجرابات ؟" و بدون تردد قلنالوا "مهو انت شلحت أول واحد" فانفجر ابن عمي من الضحك و احنا مش عارفين شو الموضوع و بعد ما خلصت نوبة الضحك قال " يا ... أنا شلحت جراباتي لانوا كانت مخزوقة !! و مش منظر أقعد و جراباتي مخزوقبن!! " في تلك اللحظة ضحكنا كلنا و ضيعنا الطريق الى اربد
ليست هناك تعليقات:
إرسال تعليق