من الطرائف الي صارت معي أثناء البحث عن عروس :) بالطرق التقليدية, طبعا بعد ما نقت أمي لمدة 3 سنوات قررت أسايرها و نروح مثل الناس على ناس ثانيين و نحاول نتعرف لعله بصير نصيب, المهم أنا أمي أجنبية, يعني مش عربية لكن المسكينة قد ما يئست مني تحولت الى خطابة محترفة, و عملت قائمة طويلة عريضة و بمجرد ما وصلت على الاردن و احنا بنتغدى و المعلقة بعدها في ثمي قالت "يلا" و ابتداء المشوار! يعني بصير مواقف كثيرة في مثل هاي الحالات بس موقف واحد بعدني بضحك لما بتذكره.
قالولنا عن وحده في الحصن – اربد, طويلة و بيضا و شقرا و نحيفة و مخلصة جامعة و أخلاق و قيم و .... الطريف انوا الناس بتحط صفات للعروس بدون ما يرجعوا لعريس المستقبل, يعني بلكي أنا حابها تكون سمرا و قصيرة و ناصحا و زعرا و صايعة, ما حدا بهمه رأيك! ما علينا, روحنا لعند الجماعة و كانك فايت على دائرة المخابرات العامة, سور قد الايام, كلب بوليسي أطول مني, شبك حماية 20 ملي, جدران رمادية – شكلها عازلة للصوت و الله أعلم – و فتنا من الباب و جلسنا أنا و أمي و شخص ثالث من طرفنا – حذف اسمه/ها حفاظا على السرية – و الطرف المقابل الاب, و أربعة اخوان باحجام مختلفة و الام وراهم. و بدأت المعركة – اما الشهادة و اما النصر – الاب طبعا بلش: "انت شو مخلص؟" , "وين بتشتغل؟" و "قديش راتبك؟" و .... طبعا أنا بعدي ما حكيت اشيء و يا مصيبتي لما عرف اني مهندس كهرباء. بلش يسألني شو طبيعة شغلي, و أعطاني أمثلة من الحياة العملية و كيف لازم أتصرف و شو بعمل اذا تعطل المولد الكهربائي أو فقع فييوز! و كيف بنحدد مكان الاعطال و شو هو البورد اللي بنستخدموا عندنا بالشركة و بس قلتلوا النوع الى احنا بنستخدموا كشر و زعل و قالي "عموه, اسمع علي. هذا النوع مش كويس و أعطاله كثيرة, اسألني أنا" و صارت زيارة الخطبة زيارة عمل و قعدنا أكثر من 45 دقيقة هيك و الاب مش معطي مجال لاحد, بعد ما هدي الاب شوي و صرنا بدنا نروح لانوا الجماعة عندهم ارتباط. ما حدا اتذكر انو في بنت قاعدة فوق و عنجد كنا راح نقوم لولا انوا الام مش عارف كيف اتذكرت و وشوشت للاب اشي ما عجبوا و قال أه, اقعدوا شوي و قال لواحد من الاولاد روح نادي أختك من فوق, طبعا فزوا الاخوان الاربعة و حاوطوا البنت المسكينة و نزلوا معاها مثل "البودي جاردس"و أشار الاب على البنت الى أنا يادوب شفت طرف عينها هاي بنتي "مش متذكر اسمها" و بعديها اعتذر كتير لانوا الجماعة عندهم ارتباط و قلي لانزم نشوفك قريبا لانوا في مواضيع كثير لسه لازم نحكي فيها. و هاذ وجه الضيف!
ليست هناك تعليقات:
إرسال تعليق