زمان أوي كنت بدي أجدد جواز سفري من السفارة الاردنية في أبوظبي و كنت لازم أجدده بسرعة فاخذت معي واسطة, والد صاحبي الى بالصدفة كان بزيارة للامارات. المهم الزلمة من الناس الي بدبروا حالهم. والله أخذت الزلمة و بوجهنا على السفارة و بالطريق سألتوا اذا كان بعرف حدى بالسفارة فقالي لا, بس ما تخاف- حسيت حالي بدعاية Lifebuoy.
وصلنا السفارة و ما لقيد الزلمة أول ما دخل وقف المراسل (وهو بالمناسبة رجل كبير بالعمر كثير) و قالوا "يا خالي أنت بعدك هون, زمان ماشفتك, شو أخبارك و شو عامل" طبعا الواسطة تبعي أول مرة بحياتوا بشوف المراسل بس طريقة الحكي كانت كانوا بعرفه من زمان و افترض انوا المراسل صارلوا زمان لعمره الكبير, المراسل التخم و انعجق و انحرج, و بعد بعض جمل المجاملات سأله الواسطة "شو من السفير هاي الايام؟" فاجابه المراسل (على أساس أنه معرفة) "والله ياخالي, ما عندنا هسا, السفير روح. بس سمعت انوا فلان الفلاني رح ييجينا سفير جديد" و كانت هاي المعلومة الي بدور عليها الواسطة. و بعديها رحنا على مكتب القنصل و سلمنا عليه بحرارة و أيضا حسيت انه الواسطة بعرفوا من زمان. الواسطة تبعي قعد و حط رجل على رجل و قال للقنصل "ها, كيف الامور, أنا والله مبارح اجيت من الاردن" و كمل الواسطة تبعي أسئلة و مجاملات و بعدين ضرب ضربتوا و قال" شو سمعنا انوا "فلان الفلاني" جاي سفير جديد!" القنصل انصدم و قال "معناتوا الخبر صحيح, احنا فكرنا انوا اشاعة !!" وطبعا صار في مستوى عالي من الثقة بين الواسطة و السفير. و بعديها مشيت أموري زي العسل بكل يسر و سهولة و روحنا و أنا مبسوط و معجب بطريقة و امكانيات بعض الناس
ليست هناك تعليقات:
إرسال تعليق