لما خلص شهر العسل و الذي كان بتايلند و صلنا أنا و المدام على مطار بانكوك بدنا نرجع على الاردن و قبل ما نوصل على الكاونتر قلت لمرتي هسى بخلي الموظفة تحجزلنا الكراسي على المخرج Exit لانوا المساحة قدامك كبيرة و بنوخذ راحتنا بالقعدة خاصة انو الرحلة طويلة, و بالفعل قربنا على الكاونتر و نفشت ريشي و قلتلها بالانجليزي I have one request يعني عندي طلب فردت الموظفة على و قالت What? فانا كررت الكلام على أساس اني فكرت أنها ما سمعتني مزبوط و قلتلها I have one request فردت كمان مرة What? وأنا مرة ثانية قلت بيني و بين حالي شو مالها هاي يا انها طرشا أو انها ما بتفهم انجليزي ! و رديت قلتلها انو عندي طلب و كمات ردت بعصبية و قالت شو؟ و صار في توتر كبير و الناس ورانا صافين على الطابور. عندها حاولت مرتي تحكي معي بس أنا قلتلها خليكي على جنب و كررت كلامي ببطء شديد و قلتلها أنا...عندي....طلب... و ما لقيت الا الموظفة فاعت فيني و قالت بسرعة شو, شو, شو What, what, what? في تلك اللحظة و قبل ما ألخمها بوكس اتدخلت مرتي و قالتلي عشان الى خلقك قولها شو بدك و بعدين خاطبت هي الموظفة و قالتلها "ممكن تعطينا الكراسي على المخرج" فردت الموظفة "طبعا بعطيكي الكراسي وين ما بدك بس أخلص من جوزك" في تلك اللحظة استوعبت انو ال What تبعتها كانت سؤال عن شو الي بدي اياه !!! و أكيد عملت حالي اني زعلان و نتشت البطاقات و جحرتها و قلتلها "هه" و رحنا على الطيارة
ليست هناك تعليقات:
إرسال تعليق